2-5 aprel tarixlərində Braziliyanın Rio-de-Janeyro şəhərində 6-cı Latın Amerikası Enerji İqtisadiyyatları Görüşü (6th ELAEE) çərçivəsində Enerji İqtisadçılarının Beynəlxalq Assosasiyasının (IAEE) Rəyasət Heyətinin İllik Toplantısı və “Yeni Enerji Mənzərəsi:Latın Amerikaya təsirləri” mövzusunda Beynəlxalq Konfrans keçirilmişdir.

Sözügedən tədbirlərdə İqtisadiyyat Nazirliyi İqtisadi İslahalar Elmi Tədqiqat İnstitutunun direktoru i.e.d., professor Vilayət Vəliyev iştirak etmişdir.

Aprelin 2-də keçirilən İllik Toplantıda IAEE-nin illik fəaliyyətinin hesabatı dinlənilmiş, cari il üzrə planlaşdırılan işlər, eləcə də tədbirin təşkilinə dair cari vəziyyət, qurumun Avroasiya regionunda fəaliyyətinin genişləndirilməsi, habelə, Qafqaz və Orta Asiya (CCAEE) filialının yaradılması imkanları geniş müzakirə edilmişdir.  

Daha sonra 3-5 aprel tarixlərində keçirilən Beynəlxalq Konfransda enerji iqtisadiyyatları sahəsində məsləhətçilər, analitiklərlə yanaşı, elm, biznes, siyasət qərarları qəbul edənlərin iştirakı ilə Latın Amerikasında enerji problemlərinin müzakirə edildilişdir.

Qeyd edilmişdir ki, Latın Amerikası neft-qaz, şist ehtiyatları ilə yanaşı yenilənə bilən enerji resursları ilə zəngindir və mövcud resurs imkanı nəinki regionda, eləcə də dünyada enerji tələb-təklifi və qiymət dəyişmələrində köklü dəyişikliklər əmələ gətirmək gücündədir. Sözügedən istiqamətdə aparılan müzakirələrdə Azərbaycan və Xəzərhövzəsi regionunun enerji potensialı üzrə müzakirələr aparılmışdır.

Enerji iqtisadiyyatları sahəsində dünyanın aparıcı enerji məsləhətçilər və analitiklərilə yanaşı, elm, biznes, siyasət qərarları qəbul edənlərinin iştirakı ilə köklü dəyişikliklərə məruz qalan qlobal enerji senari və meyllərinin müzakirə edildiyi “Yeni Enerji Mənzərəsi: Latın Amerikaya təsirləri” Beynəlxalq Konfransın plenar iclaslarında və 36 bölmə iclaslarında ümumilikdə 160-a yaxın məruzə dinlənilmiş, i.e.d., professor Vilayət Vəliyev “Bərpa oluna bilən enerji mənbələri və elektrik enerjisi” bölməsinə sədrlik etmişdir.

Sahəsinin peşəkarlarından olan IAEE-nin elmi-texniki tədbirlərində fəal iştirak və səmərəli əməkdaşlıq analitik imkanların genişləndirilməsi, çap materialları, tədris vasitələri, məlumat bazalarından və s. birgə faydalanmağa geniş şərait yaradır.

Xatırladaq ki, i.e.d., professor V.Vəliyev 1994-cü ildən etibarən qurumla fəal əməkdaşlıq edir və hazırda IAEE-nin MDB ölkələrilə fəaliyyətinin genişləndirilməsi istiqamətində yaxından iştirak edir. 

© İstifadə zamanı www.ier.az saytına istinad zəruridir.